Mujodala surasi

Mujodala surasi – Qur'on karimning 58-surasi bo'lib, Madina shahrida nozil qilingan va 22 oyatdan iborat.
Suraning nomi arabchadan tarjima qilinganda "Munozara" yoki "Tortishuv" degan ma'noni anglatadi. Bu nom suraning birinchi oyatida zikr qilingan, eri bilan yuzaga kelgan oilaviy muammo (zihor) sababli Payg'ambarimiz Muhammad (s.a.v.) bilan bahslashgan ayol qissasidan olingan.
Suradan olinadigan foidalar:
• Pinhona suhbatlar (Najvo) odobi: Odamlar orasidagi yomon niyatli, maxfiy pichirlashishlar va fitna qo'zg'ash maqsadidagi pinhona uchrashuvlar qoralanadi. Suhbatlar faqat yaxshilik va taqvo yo'lida bo'lishi buyuriladi.
• Majlis odoblari: Solihlar majlisida kelganlarga joy bo'shatish, kengroq joylashish odobi o'rgatiladi va buning evaziga Alloh taolo bandaning rizqi hamda joyini keng qilib qo'yishi va'da qilinadi.
• Allohning firqasi va shayton firqasi: Suraning oxirida imon keltirgan, Alloh va Uning Rasuliga itoat qilganlar "Allohning guruhi (hizbi)" deb ataladi va ularning najot topishi, kofirlar esa "shayton guruhi" bo'lib, yutqazishi bayon etiladi

Suraning fazilatlari
• Allohni doim yodda tutish: Bu sura Qur'ondagi har bir oyatida "Alloh" lafzi qatnashgan yagona suradir. Uni o'qigan inson har bir jumlada Xoliqning ismini zikr qilib, Alloh taolo har bir maxfiy suhbat va amaldan xabardor ekanini qalbdan his qiladi.
• Allohning guruhidan (Hizbulloh) bo'lish: Suraning so'nggi oyatida Alloh va Uning Rosulini yaxshi ko'rganlar mukofoti zikr qilingan. Uni tushunib amal qilganlar dunyo va oxiratda najot topuvchi "Allohning guruhi" degan sharafli nomga loyiq ko'riladi.
• Majlis va muloqot odobini o'rgatishi: Sura odamlar orasidagi pinhona hasadgo'ylik (najvo) kabi yomon illatlardan qaytarib, o'zaro suhbatlarda to'g'rilikni va majlislarda bir-biriga joy bo'shatish kabi olijanob fazilatlarni shakllantiradi.
• Tibbiy va himoya xosiyatlari (Kattalar va ulamolar tajribasidan)
Manbalarda suraning shifobaxshlik va himoya xususiyatlari haqida quyidagi holatlar tajriba qilingani aytiladi:
• Kasalga shifo: Bemor odam qoshida ixlos bilan o'qilsa, Allohning izni bilan og'riqlar yengillashishi va shifo topishi umid qilinadi.
• Tinchlik va xotirjamlik: Bezovta bo'lib uxlolmayotgan yoki doimiy qo'rquv, talvasada yurgan kishiga o'qilsa, ruhiy xotirjamlik baxsh etadi.
• Yomonliklardan himoya: Mazkur surani muntazam tilovat qilib yurish insonni dushmanlarning maxfiy fitnalari, g'iybat va chaqimchiliklarining zararidan asraydi.

Foydalanilgan manbaalar
1. Shayx Muhammad Sodiq Muhammad Yusuf “Tafsiri hilol” 3-juz
2. https//islom.uz
3. https//muslimaat.uz